باۋىرجان سۇرىپكەلوۆ جامبىل اۋداندىق ىشكى ىستەر بولىمىندە كەزەكشىنىڭ كومەكشىسى قىزمەتىن اتقارادى. جۇمىس ءوتىلى ءۇش جىل عانا.
وقيعا بولعان كۇنى دەم الىپ جاتقان پوليتسيا سەرجانتى كورشى ءۇيدىڭ قىزىل جالىنعا ورانعانىن بايقاپ قالىپ, دەرەۋ سىرتقا ۇمتىلادى. ءتيىستى ورىندارعا حابار بەرىپ, ءوزى كومەككە اسىعادى. تاجىريبەسىنىڭ ازدىعىنا قاراماستان ءابجىل قيمىلداپ, وتاناسىن, 10 جاستاعى قىزىن جانە 4 جاستاعى ۇلىن ۇيدەن امان الىپ شىعادى. جەدەل كۇش كەلگەنشە كورشىسى ۆلاديمير حراموۆ ەكەۋى بىرلەسىپ, ءورتتىڭ ءارى قاراي ورشىمەۋىن قاداعالايدى.
باۋىرجاننىڭ ەرلىگى جايلى حاباردى ارىپتەستەرى كەيىن ەستيدى. وعان دەيىن ءوزى ءتىس جارىپ ۇندەمەيدى.
«مەنىڭ ورنىمدا بولسا, كەز كەلگەن ادام قول جايىپ, قاراپ تۇرماس ەدى. مۇنداي قىسىلشاڭ ساتتە كومەك بەرۋ – ءبارىمىزدىڭ ازاماتتىق بورشىمىز», دەيدى پوليتسيا سەرجانتى.
ءومىر ەسقالي,
«ەگەمەن قازاقستان»
